La Lia dles uniuns dl sport de Südtirol

La Lia dles uniuns dl sport de Südtirol Verband der Sportvereine Südtirols (VSS) é gnüda metüda sö ai 28 de novëmber dl 1970 sciöche organisaziun tët dles uniuns dl sport todësces y ladines de Südtirol. Aladô dl statut é le compit prinzipal dl VSS chël de tó sö y fá valëi les ghiranzes de sü mëmbri te dötes les chestiuns che á da nen fá cun le sport. Sc’al ê tl ann dla fondaziun 91 uniuns, é sëgn le numer dles uniuns che fej pert dl VSS bele rové a 500, cun 1.252 seziuns y rodunt 84.000 mëmbri. Tres la colaboraziun cun organisaziuns y grups soziai, cun la politica, cun les autorités y cun d’atres organisaziuns sportives dëida la lia da cherié les condiziuns che vá debojëgn por les ativités sportives dles uniuns dl sport. La direziun dl VSS é tles mans dla Surastanza cun le presidënt Paul Romen, le vize presidënt Thomas Tiefenbrunner y i ot rapresentanc di raiuns. Le VSS é sciöche organisaziun tët dl sport te Südtirol le portausc y le rapresentant di interesc dles uniuns, al dëida cherié les condiziuns che é debojëgn por les ativités sportives y la vita dles uniuns tres la colaboraziun cun organisaziuns y grups soziai, cun la politica, cun les autorités y cun d’atres organisaziuns sportives. Implü organisëia la lia n’ativité de jüch y de sport regolara y ordinara tla forma de programs por la promoziun dl’ativité jonila y promöi a chësta manira le sport de massa. Tres i cursc de formaziun y de ajornamënt profescionai y interdisciplinars y i cursc de spezialisaziun por maestri de sport, arbitri y alenadus se fistidiëia le VSS dla cualificaziun di dirigënc, di colaboradus y di tecnics.

Sambëgn ti dá la Lia dles uniuns dl sport de Südtirol ince n aiüt concret te chestiuns iuridiches, fiscales y de assiguraziun y ara pita consulënza sön chestiuns che á da nen fá cun la medejina sportiva, la costruziun de strotöres sportives, les finanzes, l’organisaziun de manifestaziuns sportives, la presentaziun de domandes ales autorités, contrac y convenziuns. Ara dá consëis da mëte sö uniuns, da lauré fora statuc y regolamënc y ara á contac internazionai cun organisaziuns sportives y cun assoziaziuns y se dá da fá da agn incá te na manira intensiva por arjunje l’autonomia dl sport y süa sconanza iuridica.

 

Programs sportifs

La Lia dles uniuns dl sport de Südtirol mët a jí programs por la promoziun dl’ativité jonila te disciplines sportives desvalies. Al vëgn organisé campionac, turniers, sojornanzes da d’isté por jogn y tröp d’ater. Les ativités vëgn metüdes a jí dales seziuns dl VSS. Al momënt se fistidiëia la lia dles uniuns dl sport de Südtirol de 17 seziuns:

  • Badminton
  • Sport por porsones cun bojëgns particolars
  • Palé
  • Palé a man
  • Canoa
  • Chidlé
  • Atletica lisiera
  • Roda
  • Combatimënt
  • Stlopeté
  • Nodé
  • Sport por jënt atempada
  • Tennis
  • Ping-pong
  • Ginastica
  • Volley
  • Sporc da d’invern

Vignun de chisc programs sportifs á n so presidënt che laora sciöche volontar y che é la pröma porsona de referimënt por les uniuns/scuadres che toca lapró. L’ofize VSS cun a ce so aministradú Daniel Hofer se fistidiëia de düc i programs sportifs.

Formaziun

I cursc de formaziun y de ajornamënt profescionai y interdisciplinars y i cursc de spezialisaziun por maestri de sport, arbitri y alenadus vëgn organisá por garantí la cualificaziun di dirigënc, colaboradus y tecnics. Implü dá le VSS informaziuns sura i svilups nüs ti seturs plü desvalis tratan convëgns y seminars. Tl setur dla consulënza ales uniuns dá le VSS n aiüt concret te chestiuns legales, fiscales y de assiguraziun, y al pita consulënza te chestiuns che reverda la medejina sportiva, la costruziun de strotöres sportives, i finanziamënc, l’organisaziun de manifestaziuns sportives, la presentaziun de domandes ales autorités, contrac y convenziuns y implü dál consëis da mëte sö uniuns, da lauré fora statuc dles uniuns y regolamënc.

Proteziun che vëgn pitada dal’assiguraziun

Da agn incá ti stál a cör al VSS dantadöt da ti pité a sü mëmbri na proteziun che vëgn pitada dal’assiguraziun aladô di bojëgns y di cos?. Les uniuns che fej pert dl VSS é automaticamënter curides da n’assiguraziun de responsabilité zivila globala cuntra terzi y da n’assiguraziun de proteziun iuridica, olache la lia dles uniuns dl sport de Südtirol se surantol döta la premia d’assiguraziun, zënza cos? por les uniuns. Implü él la poscibilité da fá n’assiguraziun facoltativa cuntra inizidënc.

Proiec y iniziatives

La Lia dles uniuns dl sport de Südtirol mët tres indô a jí scomenciadies nöies. Dal 2000 incá vëgnel metü a jí vigni ann l’aziun laur ejemplar cun i jogn tl’uniun dl sport. Les uniuns che fej pert dl VSS pó mené ite sü proiec fac por la promoziun dl’ativité jonila. Na iuria nominëia les 3 uniuns che á fat n laur ejemplar por i jogn y che á albü tröp suzes. A chëstes ti vëgnel surandé na premia de incorajamënt de 5.000, respetivamënter 2.500 y 1.500 euro metüda a desposiziun dala Cassa Raiffeisen.

Dal 2004 incá vëgnel ince premié l’alenadú y l’alenadëssa dl ann. Les uniuns pó mené ite sües propostes y na iuria chir fora i davagnadus. Cun chësc pest dessel gní onoré cun n trofé particolar l’ativité preziosa di alenadus/dles alenadësses tl setur jonil.